Описание
Спектакль на крымскотатарском языке Эвель эзельден бир чокъ халкъларнынъ келин хырсызламакъ киби адети бар эди. Кунюмизде базы тюркий халкълар бу адетни кутюп кельмектелер. Ю. Махульдурнынъ пьесасында исе, эки потенциаль киевнинъ хырсызланмасы акъкъында мизах усулынен ифаде этиле. Эр шейнинъ чаресини тапкъан Мерьем бита эки генчнинъ хырсызлыгъыны тешкиль эте. О чин ниетинен торунына ляйыкъ омюр аркъадаш тапып, оны бахтлы корьмеге истей. Мерьем бита чешит айнеджиликлерни къулланаракъ, эр кеснен анълаша бильмек ве макъсадына етмек киби чизгилернинъ саибеси оларакъ, ким ким олгъаныны огренмекте ярдымджы ола. Киевлернинъ лафы, тавыры ве инсанлыкъ эдебине насыл этип къыймет кескенлерини корип, анълап, эм спектакль къараманларына, эм сейирджилерге Фатиме торун кимнен даа бахтлы оладжагъыны анъламагъа ярдым эте. Бахтлы олмакъ ичюн исе, не асыл олмакънынъ, не алынгъан рутбелернинъ, не де зенгинликнинъ эмиети ёкъ, етер ки, эки инсан арасында акъикъий севги дуйгъусы олсун! Ондан да гъайры, пьесанынъ ог гъаелерден бири – къырымтатарларнынъ эсас адетлерден бири, эвлевюн меселесинде ана-бабанынъ разылыгъыны алмакъ кереклиги нумайыш этиле. Саналаштырма узеринде чалышкъан такъым, Къырымтатар театрининъ бедиий ребери Р. Бекташевнинъ ёлбашчылыгъында, xалкъымызгъа xас олгъан парлакъ ве икметли мизах инджеликлерини, гузель декорация, хореографик ве музыкаль номерлерни санада нумайыш этеджеклер.