Къырымтатар Миллий театринде Къырымда нам къазангъа артист, сана устасы Эшреф Ягьяевнинъ 60 йыллыкъ юбилейине багъышлангъан иджадий акъшамы отькерильди.
Энди 35 сене девамында Миллий театримизде хызмет эткен Эшреф бейнинъ образлары халкъымызнынъ хатырасында яшай. Акъшам девамында «Тартюф», «Къадынларны къорчаланъ», «Геджелер хайыр», «Джанкойлю Дон Жуан», «Ким экен Ахмет акъай!», «Селям алейкум!» спектакллерден парчалар ве иштирак эткени фильмлерден парчалар косьтерильди.
Акъшамнынъ баш къараманы – Эшреф бейни хайырламакъ ниетинен онынъ якъынлары, дост-акърабалары, зенаатдашлары ве иджадыны урьмет, севги иле къабул эткен мухлислери зиярет эттилер. Бойледже, Миллий театримизнинъ салоны рыкъма-рыкъ олды.
Къырым Джумхуриети медениет назирининъ муавинлери артистимизни хайырлап, фахрий ярлыгъынен ве махсус нишаннен такъдирледилер. Къырым Муфтилиги, Къырымтатар музейим ве Миллетлер ара мунасебетлер комитети адындан тешеккюрнамелер берильди.
Театримизнинъ мудириети ве иджадий такъымы да севимли артистимизни энъ сыджакъ ве самимий сёзлеринен хайырладылар. Эшреф бейнинъ профессиональ усталыгъы, теджрибеси, меслекке урьмет ве севгиси театрде хызмет эткен эр бир артист ичюн нумунедир!
Эшреф Ягьяевнинъ иджадий акъшамы Къырымда нам къазангъан медениет хадими Эльмар Аблаев тарафындан саналаштырылды.
